31- هابطة في الدروج تكركر في فوطتها من صابني سلسلة في رقبتها ولا خويتم في صبعها نبوس خدها اليمين ونزيد شفتها.
32-هبطت لقاع لجنان ولقيش الشاب غايس قلت له يا شاب وشبيك غايس قال لي صبت سفينة بلا رايس حبيني ونحبك نصبحو عرايس.
33-تلمسان يا تلمسان يا لي فيك الطبل والكيسان واحدة ادات العلام وواحدة ادات الكيسان وانا ديت سيد الرجال.
34-يالقاعدة في الرياض بالشدة والتخبيلة عينك توت فريز وحواجبك نيلة تمنيت نجي لعندك على ليلة قلبي متوحشك وما صبت له حيلة.
35-أحمد يا أحمد واسمك غالي رد روحك طبيب أجي تشوف حالي نفرش لك فراش حرير ونغطيك بازاري.
36-حبطت لقاع لبحر ولقيت الما يغلي خفتوا بيدي خرجت لي حوتة وقالت لي يفرج ربي.
37-فاطمة فطوم يا سارة النجوم ولا تطلعي للسما نديرك سلوم ولا رحتي للبحر نديرك عوامة والمكتوب ألي يديك ما يكون غير أنا.
38-لو كان تدرسوني دريس الكروية ولا تقطعوني قطيع الزرودية والله ما ننساك يا ممو عيني.
39-السميد صفيتو واللوز دقيتو نطلب من ربي ما نعي في بيتو.
40-أحمد يا أحمد يا لعيروني بيك أنت خويتم الذهب وأنا فصيص فيك وأنت سنيسلة وأنا قليب فيك أنت محبس حبق وأنا نسقيك نضاربو ذراع بذراع ولي تغلب تديك.
41- ما نكلش التوت يكحلني وما نكلش القارص يشيني ومانخذش الشيخ لو كان يغنيني ناخد الشباب الي يواتيني.
42-الخمري يا لخمري ياالي كويتني بجفاك من جهتي كون مهني والله ماننساك.
43-شاب جايز على باب دارنا يطلب في تفاحة أعطيت له تفاحة قال ما بيا تفاحكم بيا محبتكم.
44-هبطت لقاع البحر فرشت زربية جاز علي الطير رمالي برية ما جيت نفتحها ندمعو عيني.
45-قالوا لي سمر قلتلهم خير من السحر قالوا لي رقيق قلت لهم رق من الجوهر الله يكون الحلال كثير الرزق و طويل العمر.
46-يالي في الجبل وأنا في السفل حجبني عليك بابا مالقيت فاش نبعتلك برية غير في عنق حمامة قلت لك يا شاب لاقيني في طريق الحمام نبوسك في خدك الأيمن ونصوم عليك ثلاث أيام.
47-حاجبك توت وعينيك يا قوت كي نشوفك نشهق ونموت.
48-طولتها عالية وشفتها غالية كي نشوفها نتعلق بها كيما يتعلق العنب في الدالية.
49حليت باب البيت وصبت الملاح رقود صبت داك الشباب ممدود القمر قال نكشف والسحاب قال خلي العاشق والعاشقة عند الله مكتوب.
50-عمتي يا عمتي ولا بالطعام راني شبعاة ولا باللبن راني رويانة ولا بوليدك ما نديه غير أنا.
51-بنتي فوق الجعلولة شعرها كي العكري ألي يحب يخطبها يجي على البكري والي يقول مشي شابة يعطيه العمى الكحلي.
52-ترجمان يا ترجمان يا مفتاح كل جنان فاتو علي البنات عاملين كي لوردات ويتقاسمو بالميزان واحدة دات الوردة والثانية ادات الحزام وأنا اديت العزيز الغالي الي يسوى عندي مليون ريال.
53-قلبي شعلت فيه النار من عشق الجار عاونيني يا يما شوفي ما صرى بي حبيبي هو سباب قرحتي سلبني بالزين والحاجب والعين راني شادة فيه حتى يوم الدين.
54-بعث لك يا الحبيب دموعي في وردةحمرا يالعدو بدلتني بامراة قالي والله ما بدلتك بالغير حبك في قلبي حتى يشيب الطير.
55-قاست على قدها قاط الذهب مجبود وطلقت على خدها سالف كحل ممددود كونوا علي شهود يا أهل الفضل والجود أنا خديم في يد لالا معبود.
56-نهار الجمعة خرجت لي جنية قالت لي حاجتك مقضية ما نقولك الصباح ولا لعشية.
57-غلقت الباب دفة على دفة ومصباحي ضاوي مره ما يطفى.
58-غرست يا سمينة في وسط الدار عروقها سكين جبير وأوراقها زنجار تمنيت من خالقي نزور مع الزيار قبة النبي الهاشمي المختار.
59-مادريتش الحليب يندار في جلد الديب وما دريتش العسل يولي بمرارة يا ويح من العباد الغدارة.
60-ما ني محبس ندرق ماني حبيقة ندبال راني خويتم في يد السي علال.
61-يا خليلتي فاطمة يا خليلتي فطوم يالي اسمك علا الناس سيادة عليك نخلي بلاد الروم وعليك نموت بلا شهادة.
62-العدو الي طغى الله يخيب مكره والتواب الي عطش الله يسقيه بمطره الليل مشى والفجر لاح عسكره كل غريب الله يرده لأهله وكل طير لوكره.
63-داوي داوي ودواكم ما يفيد أبموا ساس على ساس يسجالي نبني غرفة في العلالي نعيش فيها أنا وغزالي بركة الله الغالي وعبد القادر الجيلالي.
64-جعلولتي عالية في وسط الدالية دالية بالعنب الصافية بالحوت أعطوني بنتكم ولا نطيح نموت بنتنا عزيزة وصداقها غالي ما تنعطاش بألف دبلوم و ألف سلطاني.
65-الله يرحم اك الزمان مين كانت دموعا تجري ويدان احنا اليوم نسينا لحزان وكلنا ربي على الي دايرين لنا الفتنا فرحتنا ولات على كل لسان.
66-قاعدة معها في التسديرة هو شباب وهي صغيرة الله يحفظهم من العين والغيرة.
67-بعض الناس هما هما كي العسل في القرجومة والبعض يا لطيف كي الحبة المسمونة أنا خيرت لنتي ديك لفويمة المتمومة فيها سمايم ديما مرحومة.
68-خرجت يوم الجمعة وفي يدي نشعل شمعة ناداني صوت حنين صوت المؤذن في الصومعة قالي لي يا بنت السادة حاجتك مقضية قلت له في كم من مدة قال لي من اليوم لغدوة.
69-على ترجمان ياورد كل جنان جازوا عليك ثلات بنات وقسموك بالميزان واحدة ادات سلسلة و واحدة دات القفطان وانا ديت شيعتك كي شيعتك كي شيعة السلطان.
70-ساقية مسقية ويعوم فيها الحوت اعطوني بنتكم ولا نطيح نموت ولا حبيت تموت غير موت بنتنا معطية وسومها غالي ماية حبة لويز وماية حبة سلطاني.
71-بعث لك برية في قرنفلةحمرا مكتوبة بالذهب قلت لك يا حبيبي
بدلتني بامراة قال لي يا حبيبتي ما بندلك بالغير محبتك في قلبي حتى يشيب الطير .
72-أنا راقدة في المنام نمت روحي لابسة قمجة القمجة فرجة ما تكون غير حجة ولل تولدي ولد يخرج عالم وعالي الدرجة.
73- خرجت في الليل نطلب من الله صبت النجوم دايرين بسيدي رسول الله كل نجمة تقول الغاني هو الله واحد ما يدي بيده والو غير الي عطاه الله.
74-السفينة اللي جابت باه نكفيها باللوز والسكر نطعم غاشيها بالزبدة والعطر نطلي سواريها نطلب من ربي العزيز للحج يديها.
75-طاقة على طاقة لا تواريها سلمي على لالة ألي قاعدة فيها نجيب كاس الذهب ونسقيها نرفد غزالي من الحومة ونهرب بها.
76-خرجت في نص الليل نطلب في ربي نصيب النجوم دايرين بالنبي العربي قلت يا اله يا معبود نحيلي الوسواس والغمة على قلبي.
77-راني في وسط جنان السرور والبها ريتوا بعياني راني حالفة بربي العالي هذا المرة ما ناخذ غير البراني.
78-من درى اليابسة ترجع الخضرا ويا من درى الواد الناشف يرجع غدير ويا من درى تتبدل الساعة بالخير.
79-أحباب البعد ما أجفاهم قالو لي أشربي من الحمام تنسايهم شربت كاس ورا كاس لا نار تطفى ولا قلب ينساهم.
80-جاني في حب الملوك هدية مخبي في أوراقه أنا والحبيب في بلاد واحدة والقلب مشتاقه.
81-طار لحمام وزاد في اليام ونزل على قبة الحمام فوق سطح الغرفة ريت سيد الملاح في السحين يتوضى بست خده اليمين ورشقت له وردة .
82-الأحباب أهداو لي الأطيار وأنا نحب المقنين والأحباب هداو لي الأزهار وانا نحب لياسمين والأحباب أهداو لي الأخيار وأنا نحب الزين والزين كي نوار الدفلة مزغلل وعروقه مرين.
83-عسل يا عسل في باقية خضرا يا شميمة العاشقين يا نجمية الزهرا حلف سيد الملاح مايراشي امراة غير اذا جات غزالة باش تنطفى الجمرة.
84-عملت روحي فقير ساكن في المحراب ما ندخل ما نخرج عند روحي محكوم جازوا علي ثلاث بنات بحايك محربلة والشعور مخبلة في حالة معدومة ما سباتني يا عباد غير خدوجة وفطومة.
85-بعت لك في البرية قرنفلة حمرا فيها خطوط من الذهب وجميع من يقرا سمعت بيك يا شاب بدلتني بأخرى قال لي والله لالا ما بدلتك بالغير محبتك في قلبي حتى يشيب الطير
86- جايز على باب دارنا يفصل في العكري قلت له يا شاب فصلي على قدي قال لي أصبري يا خليلتي حتى تجي لعندي نفصلك قاط الذهب ونزيدك من عندي .
87-جايز على باب دارنا سكران يترامى رمالي في التبق خوخة ورمانة أرميت له في التبق وردة وسيسانة لعنة الله على ألأي يقول العدرة تشوشانة.
88-دزيت باب الرياض والنسري ناداني الورد حل لي الباب والزهر عنقني والياسمين ذاك الشباب ما بغى يكلمني.
89-في وجهه خانة وفي يده سيسانة ما كاش واحد كواه الحب كيمة أنا.
90-حنة يا حنة حبيتنا من الخبة وقتاه نديرك في يد بنتي ونتهنى.
91-كرسي يا كرسي والله ما نقعد عليك حتى يوم عرسي .
92-جايز على باب دارنا قال لي يا خليلتي لكان يشربيني باباك قلت له يا بابا ما يشريكش وما تكون طماع وعلى بنت الرجال نبيع سروالي ونخسر قع مالي.
93-داق على الحال وبكيت حتى صبت الأبريق وتوضيت نحي علي ربي الضيق وتهنيت.
94-كل الأعضاء فيها الداء حتى الكبدة بالنار صاهدة يالكان الأجراح تتفجر على خطرة الموت موت واحدة ولا شفاية الأعدا.
95-رحت أنا وحبيبي لشط البحر وقلت له هدرة شابة وحلمنا وقلت له لكان يفيقوا لي والدي يحفروا لي قبري بيدي ودمعوا عينين.
96-يا لنجمة لساكنة في العلالي جيتك بجاه الله ربي الغالي وصلي لي سلامي لحبيبي الغالي وقولي له غيرك واحد ما يحلالي.
97-أنا لي منكم وماني منكم وضحيت براني وأنا ألي كنت في الصف الأول أصبحت التالي يا قاسحين القلوب سقسوا جيراني الذل ما نحملوش والعز رباني.
98-الدار بعيدة على الدار والخبر لامن يجيبوا قداش من قلب صبر على فراق حبيبه.
99-الأولى عطشانة والثانية قالت شبعانة والثالثة قالت نترجى في الحبيب الي ماجانا.
100-الزين أنتاعي عنده خانة تسقسه بالريحة والحنانة نديه غير أنا ونطلب من ربي لكل مابيني وبينه يكمل بالحب والحنانة.
101- حبيبتي مجعدة لعيون عليها راني مهموم يا حبيبتي نخلي البلاد ونزيد بلاد الروم .
102-جرحت روحي بالموس والدم سال مني غشاني قالو لي راهي جاتك حاجة بالعكري والحناني.
103-شعرها كحل وعينها شهل نشوف فيها الليل والنهار وما نمل قالها ا مخلوقة راني نويتك قالت لو تصبر شوية حتى نخبر والديا.
104-حبطت لدروج فوطتها تتكركر الحسن والحسين على ركبتها أنطق السلطان قال أنا نبغيها ونطق الوزير قال أنا نتزوج بيها نطق جبريل وقال أنا عساس عليها.
105-حبيبك حبوا والسر الي بينكم خبيه وإذا حبك حبوا أكثر وإذا نساك لا تسأل عليه.
106-طليت من الطاقة ونفضت الزربية جازوا علي ثلاث شبان عليا الأول بعثوا المالك قال نفديها والثاني بعثوا الوزير وقال نغنيها والثالث الحبيب قال غير أنا اللي نديها.
107-جاو الخطابة للبيت رفدت المشوراة وبكيت وانا في قلبي خبيت.
108-زغرتوا وفرحوا يا جيراني حبيبي نسيتو جا اليوم وداني أنتما حبيتو تفرقو ربي وكيلكم يا عدياني والله ما نسمح فيه ياك أنا نبغيه وهو بغاني.
109-جزت تحت طاقتها تسمع في ضحكتها أنا واش جابني من بلاد لبلاد غير شوفت محبتها.
110-بغيت الفضة وما نبغيش النحاس بغيت وليد عمتي وما بغيتش ولد الناس.
111-لالة علاش عليك هاذ التخمام الي تتمنا يه يجيك لو كان على طول العام.
112-ريت الغزالة والجبال تصيح ترعى في الخزامة وثقيل في الشيح حق راكب الناقة وحب التسبيح اللي فارق الحبيبة كل عظم منه يصيح.
113- دموع طيح جمر ودموع طيح ياقوت عام ايجي أخضر وعام بيض ياقوتواالي عندو الزهر الحب عمرو ما يموت.
114-رشيت عتبة الباب بالزهر والطيب وسقيت قاع لحباب بالعسل وزبيب وستينيت جاني جواب فكرني في الحبييب.
115-شفت الزين بعيني واش يصبرني عليه بكيت على سنيني اللي فاتت بلا بيه الحبيب إلي يبغيني ليا ربي يخليه.
116-طلعت لراس لجنان شديت بحرف النيل جاز علي غراب قالي لي غريب مسكين والله ماني غريب في غربتي راحة بيني وبين لحبيب خوخة وتفاحة تفاح من الذهب في راس الليل الحوت في الما والما ايولول.
117-دارنا في الجبل ودار لحبيب في اسفل حجبني بابا ما صبت من نرسل رسلتك في برية قرنفلة صفرا قولتلك يا عدو بن عدو بدلتني باخرى نبدلك وكيما بكتيني نبكيك أنا ناخد صا حبك واللي عزيز عليك يلبس لباسك ويعطي الشبايه ليك.
118-سيدي يا سيدي وشبيك لا توشفيني تذبل عينيك ماني سبع ناكلك ما معيشتي على يديك نطلب ربي لحنين ايفيد دعوتي فيك تعود تمشي والتابعة تبع فيك .
119-فاطمة يا فطوم وين ماتكوني نرسلك مرسول إذا سكنتي في السما نرسلك حمامة وإذا سكنتي لبحر نرسلك عوامة وإذا سكنتي في القبر ايحاسبك مولانا.
120-دارنا في الجبل مقابلة مكة وفراشها حرير طبقة على طبقة ومصباح القصة يشعل ما يطفى.
121-علاش يا لالا لحشام رحمة الله واسعة وكبيرة لو كان جات بالكلام نتحدثوا ونعطوك تدبيرة بصح كل شيء بالمكتوب ويعيا الخير ايبان وتروح الحيرة.
122-إذا أنت ليل أنا نجمة تضويك إذا أنت بحر أنا موجة تقويك وإذا أنت ربيع أنا وردة فيك حلفت ميات يمين غير أنا لي نديك
123- بعثلك سلامي في لماء الأزرق بعثلك دموعي في القلب تحرق والله مادريت من الحب اللي بيني وبينك يفرق نكوي هذا القلب باش ما يزيدش يعشق.
124-ابريق الفضة في يدي مليان مسك وطيب هو شمعة عندي نهديهم للحبيب كي نلقاه عندي ماردت لا دوا لا طبيب.
125- عليك نبني ونهدم ونفوت دوك اللي طارو يا موردة الخد نعطيك اسرار ونحلفلك ما لحد الكاف نحول حجارو.
126-مقدود القد مسقم اغزال شافت العين شارلي وتبسم قالي أهلك وين حشمت لا نتكلم وحمارو الخدين.
127- يالحمام المعلي نعطيك تدي جواب أصفا وأرواح مولي جيب خبر الي غاب شتى في هذا البر واالافات حدا لبحر ولا تحت الحجر ولا فوق السحاب.
128- شفت الزين ابعيني واش يصبرني عليه ابكيت على سنيني فاتت بلا بيه الحبيب ليا ربي يخليه.
129- ألبست القاط جديد وبلفتول غطيت راسي وناديت نهار العيد وقاع لميت ناسي جاني من بعيد الي فك أحباسي.
130- قاعد وحدي نخمم جاني الطير فوق راسي اتبسم حاسب بشار الخير نطق سعدي تكلم قالك أغطاك حرير.
131- اعقبت على لسمر مذبل العينين أمليت حجري بالسكر والورد والياسمين بيه القلب انصب ما طاق فراق الزين.
132- طير والريش محني فات اليوم الصباح عند الباب يقابلني تبسملي وراح اعليه نشعر ونغني وعليه نعود مداح.
133-بيدي سقيت لحبق جنان دار النوار اسمعت الباب يدق حليت لولد الجار جاء القلب سرق ما خزرش المزهار لو كان يتكلم حق ويقول قاع اللي صار.
135-لحقت بلخضر ومليت لعيون بالورد والزهرؤ وياك الحب جنون واللي جاني يخير الحظ وعندي مضمون.
136-رونت الحنة بيدي و فرشت لبزار وسنيت سعدي عند باب الدار جا اليوم عيدي ونشوف فرحة الصغار.
137-صفيت ماء الورد ورشيت بيه الساس وعطيت معاه الوعد ما نرجعش أخلاص اقم بينا السعد ورفعت بيه الراس.
138-نركب في البابور ونقطع البحور عن جالك يا زهور نشوف بلاد الغربة ونجيليك البدرون زنزيد حتى البخور وانجيب مهرك مصرور ربي يوفي الطلبة.
139-زوينة يا زوينة والزين ربي اعطاك وطبعتك الحنينة وكحل العين وتاك وردة في الجنينة في يد اخصاك يحفظك ربي من لعوينة ويخليك للبغاك.
140-أقصدت الورد والياسمين قلت أبخير مرضايا واش ايدرق فالزين زادو شنايا تبكي عليهم بدموع تشفي الثنايا.
141- اعقب على باب الدار موعد عالخد أمطار ويقول يا فرب الجار ماعقبش اعليكم غزال شارد ماهوش من لبلاد ما والف لعباد ماعاد من ريحة هنا.
142- شجرة عند الباب وطرف أغصانها ذهب ناديت على لحباب جاء الطير منصب جاب معاه أجواب معاه ونقب خيار الحب .
143-وطيت مع لشعاب نلقى اعشابها وغدير ونقلكم يا لحباب اسلام وفال الخير ارسلتكم بالجواب كل ورقة بطير.
إرسال تعليق